ღ .. ترنيمــآت خــآطر ‘‘

في ساعةٍ فيها طفح كيل الاحداث
وتقسّم الهاجوس ثلاثةَ أثلاث
ثلثاً قضى نحبه وضمّته الاجداث
وثلثين / ثلثاً صادق وثلث كذاب
أعلنْت للركبَ المُهيب إنضمامي
وكـرّست به جُهدي وجُل إهتمامي
والدّين تاجي والشريعه إمامي
والصدق حبلي لـ إلتُوَتْ روس الأذناب
بعض الهواجيس يتضاعف بها الاجر
وسُنّه على المسلم مثل سُنّة الفجر
والوصل عند الناس ماهو كما الهجر
والحقّ خيمه والبراهين الأطناب
ومدح الرسول المُصطفى شي مفروض
جاراً لكم والاجل نشرب من الحوض
وإليا كتبنا فـ أطهر الخلق معروض
يالله على بابك يا فتّاح الأبواب
صلى الله وسلّم على أهله وآله
خاتِم رُسل ربي ومَهْد الرساله
وحنا ليا جاد الحديث بمجاله
نفخر ونلبس له من العز جلباب
وُلد بـ مكه في سنة وقعة الفيل
تسعه ربيع اول وعشرين إبريل
ونار المجوس اللي سنت تالي الليل
هبّت عليها الريح مشهاب مشهاب
وأقبل شعاع النور في يوم الاثنين
مع مولد المعروف إبن الذبيحين
وإيوان كسرى طاح مره وثنتين
وتهدّمت كنائس أصحاب الأرباب
الأب عبدالله وأبا الجد هاشم
اللي بوقت الحج للخبز هاشم
وقريش سيفٍ في هاك الوقت غاشم
وهذا النسب مذكور في علم الانساب
رسولنا شاعر ولاهو بـ مارد
وإسمه قبل عند العرب غير وارد
سمّاه عبدالمطلب بـ إسم شارد
ودخل به الكعبه وشرّع له الباب
لأن أبا محمداً فوق ريمه
وإبنه لازال بـ طور كيس المشيمه
قد مات مابين الجبل والخريمه
ودُفن بدار النابغه ذلك الشاب
وخلّا دموع ٍ في عيون آمنه وهب
أمّ الرسول اللي دحر كيد ابو لهب
تـنهب بياض خدودها الطّاهره نهب
وتجري على مفرِق نحرها وتنساب
ورضع ثويبه في المهد عدّة أيام
وجَدّه بحث عن مُرضعه تسكن خيام
حَسْب العوايد فـ العرب قبل الإسلام
لجل الإنسان يطول وتشدّ الأعصاب
وجنّ المراضع من بني سَعْد للبيت
ياطنّ صخر البازليت والجرانيت
وقالن : أبا الطّفل القريشي هذا ميت؟
وظنّت حليمه فيه والظن ماخاب
ومعها بقى حتى بلغ عمره الخـمْس
ولأمه رجع والمُرضعه بالها عـمْس
وبعد سنه يا مَشبَه اليوم بالأمْس
الأُم ماتت والزمن عارضه شاب
وعاش سنتين ونحو سبعين ليله
مع جَدّه اللي مايخلّي سبيله
وقبل يتوفّى حط عمّه كفيله
والعم أبو طالب كسب فيه الإعجاب
يقَدّمَه عنوه على العام والخاص
ويحمي شفيع الخلق من كل قنّاص
ورسولنا بادل مع العم الاخلاص
ودعاه للدين الحنيفي ولا تاب
ورعى الغنم ثم طق باب التجاره
وحقّق هدفها وإعتَلَى بالصّداره
وأسدل على الحُب العفيف الستاره
وأخذ خديجه وأكثرت منه الإنجاب
القاسم وزينب ولا فـ الضّنا توم
وبعد رقيّه فاطمه وأم كلثوم
وعبدالله اللي عاش طاهر ومعصوم
وعاشن بناته وأسلمن والسمر طاب
ومات الرسول وقد نكح تسع زوجات
وخمس وحدا الزوجات جابت ولد مات
وهذي خصوصيات (..... إثبـات)
ماتشمل عمُوم العرب يا أهل الألباب
ونزّل عليه الوحي جبريل بالغار
وداخل حِرا جاه الملك عِدّة أمرار
وشدّه وضمّه ضمّة ٍ دمّها حار
ويـِمّة خديجه راح خايف ومرتاب
وبالسر فـ الدعوة دعا من يثق فيه
وأخذ ثلاث سنين والشوق يدعيه
وعلى الـ .. جاه أمر من عِنْد وَالِيه
( إصْدَع بِمَا تُؤمَر ) وغامر ولا هاب
ولاقا الرسول السُخريه والظّلايم
والضحك والتكذيب وسط الولايم
وبثّ الدعاية وإضطِهَاد وشتايم
وصُبَر رسول الله على كيد الارهاب
والمشركين بعُتْمَةَ اللّيل قاموا
وعلى المحل اللي رقد فيه حاموا
يبون قتله مير خسروا وهاموا
وحطّ الرسول بروسهم حَفْنَة تراب
وهاجر ونوّخ ناقته في جبل ثور
وإبن قُحافه هَبّ للغار مذعور
وسدّد شقوق الغار والغار محظور
وهلّت دموعه والسبب قرصة الداب
في غار لكن في حصُوناً مكينه
اثنين ثالثهم منجّي السّفينه
وساقوا ركايبهم يبون المدينه
وعادت رجال قريش تفتل فـ الأشناب
وحطوا له الأنصار شاطي ومينا
على ثرى قاع ٍ مثل قاع سينا
وغنّوا : طلع بدر الليالي علينا
وأوّل عمل سوّاه مَسْجِد ومحراب
وتوالت الاحداث في كل ساعه
على الوديع المؤتمن والوداعه
وراجت بعد جهد ٍ جهيد البضاعه
والدّين جاله ضرس تكشير وأنياب
ونَسَج رسول الله كذا خيط غزوه
وهلّل وحطّ الدّين بالحرب عِزوه
ومن بعد كان الشِّرك به زود نزوه
حطّ الرسول بهامته شرك منساب
عدة غزواتٍ رَوَتْهَا التَّوَارِيخ
بالسَّيف لا بالقُنبله والصّواريخ
نصر ٍ للإسلام وللأعداء توبيخ
وعلى سبيل الأمثله غَزْوَ الأحزاب
وظلّ الكِفاح يزيد عشرين عاما
والشِّرك أَفَل والدِّين قام يتناما
وهلّ المطر وأنبت زهور الخزاما
وهبّ النسيم وشمّته كلّ الاقطار
ونوى الرسول يضم عُمره بحجّه
وآخر سنة عشره لـ مكه توجّه
وحَج .. ولا عاد لساير الناس حِجّه
الدين تمّ .. وتمّت حروف بكتاب
وعاد الرسول من المَنَاسِك لـ طَيبه
وجاه المرض من دون شِكّه ورِيبَه
وتوفّي بـ بيته وصارت مُصِيْبَه
وصار الخبر في شَكّ والصّدق ماغاب
اثنا عشر ربيع الاوَّل ضحى اثنين
ويوم الثلاثا والجسد داخل الطّين
وعُمر النبي فوق الثلاثه وستين
بـ أربع ليالي كنّهن ريشة غراب
حَامِيه ربّ الكون في حِصْن وأبراج
ومسيّره ربّه على خير مِنهاج
ومكلّمه فيـنا للإسراء والإعراج
ولا بين أمين السِّر والخالق حجاب
وحَسْب المَصَادِر والمَرَاجِع والأرشيف
لـ محمَّد الهادي طبوع وتواصيف
مَنقولةٍ عبر النّبا والسّواليف
والبعض يذكرها بشي من الإسهاب
طويل زند الرِّجل والجِسم مَربُوع
وإليا مشى يمشي ولا هو بمتبُوع
وكنّ القمر في صفحة الوجه مطبُوع
والخاتم اللي بين الأكتاف جذّاب
أفلج ثنايا والحواجب مقاويس
ماتقترن والعين عين القرانيس
وكيفي بذقن وضخم راس وكراديس
وأسود شعر وأخمص قدم وأضف الأرداب
قوله بليغ وفي لسانه فَصَاحَه
خُلقه عظيم وراحته خير راحه
وأكثَر حَيَاء الناس وأطيَب سماحه
وأشجع من المصدوم لا قصّ الأرقاب
وأعدل بشر وأعفّ وأصْدق هَلَ الكون
وبالعهد وافي ومتواضع ومَامُون
وفصل الكلام ولا تكلّم على الهون
وليّن جَنَاب وتجتمع فيه الآداب
نفديه بالارواح والأهل والإبن
ونكره على شانه بلد صانع الجِبن
راع الكذب والخُبث والبُخل والجُبن
اللي يحط العقد وينكّس الكاب
ويالله ياللي كل دعوه تنحّرك
سلّط على النرويج وأهل الدنمارك
وإجعل كبار مكانهم فـ أسفل الدرك
وشتّت جُموع أسْلافهم وسط الاشعاب
وصلّي عدد خلقِك على نسل عدنان
وإرض اللهم عن رجالٍ لهم شان
عَلِي وأبو بكر وعُمر وإبن عَفّان
واللي تبع مِنهاجُهم حضر وأعراب